Halwara Airport ਨੂੰ ਅੰਮ੍ਰਿਤਸਰ-ਜਾਮਨਗਰ ਐਕਸਪ੍ਰੈੱਸਵੇਅ ਨਾਲ ਜੋੜਨ ਦੀ ਯੋਜਨਾ, ਰੋਡ ਮੈਪ ਤਿਆਰ
ਹਲਵਾਰਾ ਅੰਤਰਰਾਸ਼ਟਰੀ ਹਵਾਈ ਅੱਡੇ ਨੂੰ ਅੰਮ੍ਰਿਤਸਰ-ਜਾਮਨਗਰ (ਗੁਜਰਾਤ) ਐਕਸਪ੍ਰੈੱਸਵੇਅ ਨਾਲ ਜੋੜਨ ਲਈ ਯੋਜਨਾ ਤਿਆਰ ਹੋ ਗਈ ਹੈ। ਇਹ ਐਕਸਪ੍ਰੈੱਸਵੇਅ ਅੰਮ੍ਰਿਤਸਰ ਤੋਂ ਲੁਧਿਆਣਾ, ਬਠਿੰਡਾ, ਅਜਮੇਰ ਰਾਹੀਂ ਜਾਮਨਗਰ ਤਕ ਬਣਾਇਆ ਜਾ ਰਿਹਾ ਹੈ।
ਪਹੁੰਚ ਸੜਕ ਚੌੜੀ ਕਰਨ ਦੀ ਲੋੜ
ਹਲਵਾਰਾ ਹਵਾਈ ਅੱਡੇ ਦੀ ਮੌਜੂਦਾ 20 ਫੁੱਟ ਚੌੜੀ ਅਤੇ 5 ਕਿ.ਮੀ. ਲੰਬੀ ਪਹੁੰਚ ਸੜਕ ਉਡਾਨਾਂ ਦੀ ਸ਼ੁਰੂਆਤ ਤੋਂ ਬਾਅਦ ਵਧਦੇ ਟ੍ਰੈਫਿਕ ਦਬਾਅ ਨੂੰ ਝਲਣ ਦੇ ਯੋਗ ਨਹੀਂ। ਏਅਰਪੋਰਟ ਅਥਾਰਟੀ ਆਫ਼ ਇੰਡੀਆ ਨੇ ਇਸ ਨੂੰ 100 ਫੁੱਟ ਚੌੜਾ ਕਰਨ ਦੀ ਸਿਫ਼ਾਰਸ਼ ਕੀਤੀ ਹੈ।
ਐਕਸਪ੍ਰੈੱਸਵੇਅ ਰੂਟ ਅਤੇ ਹਲਵਾਰਾ ਨਾਲ ਸਿੱਧਾ ਕਨੈਕਸ਼ਨ
ਅੰਮ੍ਰਿਤਸਰ-ਜਾਮਨਗਰ ਐਕਸਪ੍ਰੈੱਸਵੇਅ, ਜੋ ਲੁਧਿਆਣਾ ਦੇ ਬੱਲੋਵਾਲ ਪਿੰਡ ਨੇੜੇ ਲੰਘੇਗਾ, ਨੂੰ ਹਲਵਾਰਾ ਹਵਾਈ ਅੱਡੇ ਤੱਕ ਇੱਕ ਵੱਖਰੀ ਲੇਨ ਰਾਹੀਂ ਜੋੜਿਆ ਜਾਵੇਗਾ। ਇਹ 6-ਮਾਰਗੀ ਐਕਸਪ੍ਰੈੱਸਵੇਅ ਹਲਵਾਰਾ ਤੱਕ 200 ਫੁੱਟ ਚੌੜਾ ਹੋਵੇਗਾ।
ਕਿਸਾਨਾਂ ਨੂੰ ਮੁਆਵਜ਼ੇ ਦੀ ਉਮੀਦ
ਐਕਸਪ੍ਰੈੱਸਵੇਅ ਲਈ ਹਲਵਾਰਾ ਅਤੇ ਐਤੀਆਣਾ ਦੇ ਕਿਸਾਨਾਂ ਦੀ ਜ਼ਮੀਨ ਐਕੁਆਇਰ ਕੀਤੀ ਜਾ ਰਹੀ ਹੈ। ਪਹੁੰਚ ਸੜਕ ਦੇ ਦੋਵਾਂ ਪਾਸਿਆਂ ਜ਼ਮੀਨ ਦਾ ਕੁਲੈਕਟਰ ਰੇਟ 18-25 ਲੱਖ ਰੁਪਏ ਪ੍ਰਤੀ ਏਕੜ ਨਿਰਧਾਰਤ ਕੀਤਾ ਗਿਆ।
ਐਤੀਆਣਾ ਦੇ ਸਾਬਕਾ ਸਰਪੰਚ ਲਖਵੀਰ ਸਿੰਘ ਨੇ ਦੱਸਿਆ ਕਿ 2019 ਵਿੱਚ ਹਵਾਈ ਅੱਡੇ ਲਈ 80 ਲੱਖ ਰੁਪਏ ਪ੍ਰਤੀ ਏਕੜ ਦੇਣ ਦਾ ਵਾਅਦਾ ਕੀਤਾ ਗਿਆ ਸੀ, ਪਰ ਬਾਅਦ ਵਿੱਚ 21 ਲੱਖ ਰੁਪਏ ਪ੍ਰਤੀ ਏਕੜ ਮੁਆਵਜ਼ਾ ਦਿੱਤਾ ਗਿਆ। ਹੁਣ, ਐਕਸਪ੍ਰੈੱਸਵੇਅ ਲਈ ਐਕੁਆਇਰ ਹੋ ਰਹੀ ਜ਼ਮੀਨ ਉੱਤੇ ਕਿਸਾਨਾਂ ਨੂੰ ਢੁਕਵੇਂ ਮੁਆਵਜ਼ੇ ਦੀ ਉਮੀਦ ਹੈ।