ਟ੍ਰੈਫ਼ਿਕ ਜਾਮ ਨੇ ਖੋਹ ਲਈ ਮਾਸੂਮ ਦੀ ਜਾਨ, ਚੌਥੀ ਮੰਜ਼ਿਲ ਤੋਂ ਡਿੱਗੇ ਬੱਚੇ ਨੂੰ ਨਹੀਂ ਮਿਲ ਸਕੀ ਫ਼ੌਰੀ ਸਹਾਇਤਾ

ਵੀਰਵਾਰ ਨੂੰ ਮਹਾਰਾਸ਼ਟਰ ਦੇ ਵਸਈ ਵਿੱਚ ਇੱਕ ਦੁਖਦਾਈ ਘਟਨਾ ਨੇ ਪੂਰੇ ਖੇਤਰ ਨੂੰ ਝੰਜੋੜ ਕੇ ਰੱਖ ਦਿੱਤਾ। ਮੁੰਬਈ-ਅਹਿਮਦਾਬਾਦ ਰਾਸ਼ਟਰੀ ਰਾਜਮਾਰਗ 'ਤੇ ਸਵੇਰ ਤੱਕ ਚੱਲੇ ਭਾਰੀ ਟ੍ਰੈਫਿਕ ਜਾਮ ਦੇ ਕਾਰਨ ਇੱਕ ਐਂਬੂਲੈਂਸ ਦੋ ਸਾਲ ਦੇ ਬੱਚੇ ਦੀ ਜਾਨ ਨਹੀਂ ਬਚਾ ਸਕੀ। ਦੱਸ ਦਈਏ ਕਿ ਬੱਚਾ ਖੇਡਦੇ ਹੋਏ ਚੌਥੀ ਮੰਜ਼ਿਲ ਤੋਂ ਡਿੱਗ ਗਿਆ।

ਬੱਚੇ ਨੂੰ ਲੱਗੀਆਂ ਸਨ ਗੰਭੀਰ ਸੱਟਾਂ

ਪੇਲਹਾਰ ਇਲਾਕੇ ਦਾ ਰਹਿਣ ਵਾਲਾ ਰਿਆਨ ਸ਼ੇਖ (2 ਸਾਲ) ਵੀਰਵਾਰ ਦੁਪਹਿਰ ਨੂੰ ਚੌਥੀ ਮੰਜ਼ਿਲ ਤੋਂ ਡਿੱਗ ਪਿਆ। ਉਸ ਦੇ ਪੇਟ ਵਿੱਚ ਗੰਭੀਰ ਸੱਟਾਂ ਲੱਗੀਆਂ। ਉਸ ਦੇ ਪਰਿਵਾਰ ਨੇ ਤੁਰੰਤ ਉਸ ਨੂੰ ਨੇੜਲੇ ਗਲੈਕਸੀ ਹਸਪਤਾਲ ਪਹੁੰਚਾਇਆ।

ਐਂਬੂਲੈਂਸ ਅੱਗੇ ਵਧਣ ਵਿੱਚ ਸੀ ਅਸਮਰੱਥ

ਮੁੱਢਲੀ ਸਹਾਇਤਾ ਦੇਣ ਤੋਂ ਬਾਅਦ, ਡਾਕਟਰਾਂ ਨੇ ਉਸ ਨੂੰ ਇੱਕ ਵੱਡੇ ਹਸਪਤਾਲ ਲਿਜਾਣ ਦੀ ਸਿਫਾਰਸ਼ ਕੀਤੀ। ਦੁਪਹਿਰ ਲਗਭਗ 1:30 ਵਜੇ, ਰਿਆਨ ਨੂੰ ਐਂਬੂਲੈਂਸ ਰਾਹੀਂ ਮੁੰਬਈ ਭੇਜਿਆ ਗਿਆ। ਹਾਲਾਂਕਿ, ਸਵੇਰ ਤੋਂ ਹੀ ਮੁੰਬਈ-ਅਹਿਮਦਾਬਾਦ ਰਾਸ਼ਟਰੀ ਰਾਜਮਾਰਗ 'ਤੇ ਭਾਰੀ ਟ੍ਰੈਫਿਕ ਜਾਮ ਹੋਣ ਕਾਰਨ, ਐਂਬੂਲੈਂਸ ਅੱਗੇ ਵਧਣ ਵਿੱਚ ਅਸਮਰੱਥ ਸੀ।

25 ਕਿਲੋਮੀਟਰ ਲੰਬਾ ਟ੍ਰੈਫਿਕ ਜਾਮ

ਦੁਪਹਿਰ ਤੱਕ, ਟ੍ਰੈਫਿਕ ਜਾਮ ਹੋਰ ਵੀ ਗੰਭੀਰ ਹੋ ਗਿਆ। ਮੁੰਬਈ-ਗੁਜਰਾਤ ਅਤੇ ਗੁਜਰਾਤ-ਮੁੰਬਈ ਦੋਵਾਂ ਰੂਟਾਂ 'ਤੇ ਵਾਹਨਾਂ ਦੀਆਂ 20 ਤੋਂ 25 ਕਿਲੋਮੀਟਰ ਲੰਬੀਆਂ ਕਤਾਰਾਂ ਲੱਗ ਗਈਆਂ।

ਡਾਕਟਰਾਂ ਨੇ ਐਲਾਨਿਆ ਬੱਚੇ ਨੂੰ ਮ੍ਰਿਤਕ

ਟ੍ਰੈਫਿਕ ਜਾਮ ਵਿੱਚ ਫਸੀ ਐਂਬੂਲੈਂਸ ਵਿੱਚ ਰਿਆਨ ਦੀ ਹਾਲਤ ਵਿਗੜਦੀ ਦੇਖ ਕੇ, ਉਸ ਦੇ ਪਰਿਵਾਰ ਨੇ ਉਸ ਨੂੰ ਨੇੜਲੇ ਪਿੰਡ ਸਾਸੋਂਘਰ ਦੇ ਇੱਕ ਛੋਟੇ ਜਿਹੇ ਹਸਪਤਾਲ ਵਿੱਚ ਪਹੁੰਚਾਇਆ। ਹਾਲਾਂਕਿ, ਉੱਥੇ ਡਾਕਟਰਾਂ ਨੇ ਜਾਂਚ ਤੋਂ ਬਾਅਦ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।