ਕੁੱਤੇ ਦੇ ਮੂੰਹ 'ਚ ਬੱਚੇ ਦਾ ਸਿਰ: ਪਟਿਆਲਾ ਪੁਲਿਸ ਦੀ ਜਾਂਚ ਸਾਹਮਣੇ ਆਇਆ ਸੱਚ

ਪਟਿਆਲਾ ਪੁਲਿਸ ਨੇ ਸਰਕਾਰੀ ਰਾਜਿੰਦਰਾ ਹਸਪਤਾਲ ਵਿੱਚ ਕੁੱਤੇ ਦੇ ਮੂੰਹ ਵਿੱਚੋਂ ਮਿਲੇ ਬੱਚੇ ਦੇ ਸਿਰ ਦੇ ਮਾਮਲੇ ਨੂੰ ਸੁਲਝਾਉਣ ਦਾ ਦਾਅਵਾ ਕੀਤਾ ਹੈ। ਪੁਲਿਸ ਦਾ ਦਾਅਵਾ ਹੈ ਕਿ ਬੱਚੇ ਦੇ ਪਿਤਾ ਨੇ ਮ੍ਰਿਤਕ ਬੱਚੇ ਨੂੰ ਕੂੜੇਦਾਨ ਵਿੱਚ ਸੁੱਟ ਦਿੱਤਾ ਸੀ। ਪੁਲਿਸ ਨੇ ਸਿਵਲ ਲਾਈਨਜ਼ ਥਾਣੇ ਵਿੱਚ ਧਾਰਾ 94 ਬੀ.ਐੱਨ.ਐੱਸ. ਤਹਿਤ ਮਾਮਲਾ ਦਰਜ ਕਰਕੇ ਦੋਸ਼ੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।

ਪੁਲਿਸ ਅਨੁਸਾਰ ਬੱਚੇ ਦੇ ਪਿਤਾ ਗਿਰਧਾਰੀ ਲਾਲ ਕੋਲ ਬੱਚੇ ਦੀ ਲਾਸ਼ ਨੂੰ ਦਫ਼ਨਾਉਣ ਲਈ ਪੈਸੇ ਨਹੀਂ ਸਨ। ਉਹ ਇਕੱਲਾ ਸੀ ਅਤੇ ਆਪਣੀ ਪਤਨੀ ਦੀ ਦੇਖਭਾਲ ਕਰ ਰਿਹਾ ਸੀ। ਇਸ ਲਈ ਉਸਨੇ ਬੱਚੇ ਦੀ ਲਾਸ਼ ਨੂੰ ਪੋਲੀਥੀਨ ਬੈਗ ਵਿੱਚ ਪਾ ਕੇ ਡਸਟਬਿਨ ਵਿੱਚ ਸੁੱਟ ਦਿੱਤਾ। ਡਸਟਬਿਨ ਨੂੰ ਹਸਪਤਾਲ ਦੇ ਕੂੜੇ ਦੇ ਡੰਪ ਵਿੱਚ ਖਾਲੀ ਕਰ ਦਿੱਤਾ ਗਿਆ। ਆਵਾਰਾ ਕੁੱਤਿਆਂ ਨੇ ਲਾਸ਼ ਨੂੰ ਉੱਥੋਂ ਬਾਹਰ ਕੱਢ ਲਿਆ ਸੀ।

ਐੱਸ.ਐੱਸ.ਪੀ. ਵਰੁਣ ਸ਼ਰਮਾ ਨੇ ਕਿਹਾ ਕਿ ਪੁਲਿਸ ਨੇ ਤਕਨੀਕੀ ਤੌਰ 'ਤੇ ਮਾਮਲਾ ਹੱਲ ਕਰ ਲਿਆ ਹੈ। ਉਨ੍ਹਾਂ ਕਿਹਾ ਕਿ ਬੱਚਾ ਮਰਿਆ ਹੋਇਆ ਪੈਦਾ ਹੋਇਆ ਸੀ। ਅਜਿਹੇ ਮਾਮਲੇ ਨੂੰ ਇੰਟਰਾਯੂਟਰਾਈਨ ਡੈੱਥ (ਆਈ.ਯੂ.ਡੀ.) ਕਿਹਾ ਜਾਂਦਾ ਹੈ।

ਹਸਪਤਾਲ ਪ੍ਰਸ਼ਾਸਨ ਦੇ ਅਨੁਸਾਰ, ਗਿਰਧਾਰੀ ਲਾਲ ਅਤੇ ਉਸਦੀ ਪਤਨੀ ਤਾਰਾ ਦੇਵੀ 24 ਅਗਸਤ ਨੂੰ ਰਾਤ ਲਗਭਗ 8:30 ਵਜੇ ਰਾਜਿੰਦਰਾ ਹਸਪਤਾਲ ਆਏ। ਬਾਅਦ ਵਿੱਚ ਤਾਰਾ ਦੇਵੀ ਨੇ ਇੱਕ ਮਰੇ ਬੱਚੇ ਨੂੰ ਜਨਮ ਦਿੱਤਾ। 25 ਅਗਸਤ ਨੂੰ ਕਾਗਜ਼ੀ ਕਾਰਵਾਈ ਪੂਰੀ ਕਰਨ ਤੋਂ ਬਾਅਦ ਬੱਚੇ ਦੀ ਲਾਸ਼ ਪਰਿਵਾਰ ਨੂੰ ਸੌਂਪ ਦਿੱਤੀ ਗਈ। ਹਸਪਤਾਲ ਪ੍ਰਸ਼ਾਸਨ ਦੇ ਅਨੁਸਾਰ, ਪੁਲਿਸ ਨੇ ਮ੍ਰਿਤਕ ਬੱਚੇ ਦੀਆਂ ਸੁਰੱਖਿਅਤ ਤਸਵੀਰਾਂ ਨੂੰ ਗਿਰਧਾਰੀ ਲਾਲ ਦੇ ਮੋਬਾਈਲ ਫੋਨ ਨਾਲ ਵੀ ਮਿਲਾ ਲਿਆ ਹੈ।