ਪਲਟੀ ਯਾਤਰੀਆਂ ਨਾਲ ਭਰੀ ਕਿਸ਼ਤੀ, 27 ਦੀ ਮੌਤ, ਕਈ ਲਾਪਤਾ

ਇਟਲੀ ਦੇ ਲੈਂਪੇਡੂਸਾ ਟਾਪੂ ਨੇੜੇ ਇੱਕ ਵੱਡਾ ਸਮੁੰਦਰੀ ਹਾਦਸਾ ਵਾਪਰਿਆ ਹੈ, ਜਿੱਥੇ ਲਗਭਗ 100 ਪ੍ਰਵਾਸੀਆਂ ਨੂੰ ਲੈ ਕੇ ਜਾ ਰਹੀ ਇੱਕ ਕਿਸ਼ਤੀ ਪਲਟ ਗਈ। ਇਸ ਹਾਦਸੇ ਵਿੱਚ ਘੱਟੋ-ਘੱਟ 27 ਲੋਕਾਂ ਦੀ ਮੌਤ ਹੋ ਗਈ, ਜਦਕਿ ਦਰਜਨਾਂ ਅਜੇ ਵੀ ਲਾਪਤਾ ਹਨ। ਇਤਾਲਵੀ ਤੱਟ ਰੱਖਿਅਕ ਅਤੇ ਸੰਯੁਕਤ ਰਾਸ਼ਟਰ ਸ਼ਰਨਾਰਥੀ ਏਜੰਸੀ (UNHCR) ਨੇ ਇਸ ਘਟਨਾ ਦੀ ਪੁਸ਼ਟੀ ਕੀਤੀ ਹੈ

ਐਕਸ 'ਤੇ ਇੱਕ ਪੋਸਟ 'ਚ ਗ੍ਰਾਂਡੀ ਨੇ ਕਿਹਾ,"#ਲੈਂਪੇਡੂਸਾ ਨੇੜੇ ਇੱਕ ਦੁਖਦਾਈ ਹਾਦਸੇ ਮਗਰੋਂ ਘੱਟੋ-ਘੱਟ 27 ਲੋਕ ਡੁੱਬ ਗਏ ਹਨ। 2025 'ਚ ਕੇਂਦਰੀ ਮੈਡੀਟੇਰੀਅਨ 'ਚ 700 ਤੋਂ ਵੱਧ ਸ਼ਰਨਾਰਥੀਆਂ ਅਤੇ ਪ੍ਰਵਾਸੀਆਂ ਦੀ ਮੌਤ ਹੋ ਗਈ ਹੈ। ਇਨ੍ਹਾਂ ਹਾਦਸਿਆਂ ਦੇ ਮੱਦੇਨਜ਼ਰ ਸਮੁੰਦਰ 'ਚ ਬਚਾਅ, ਸੁਰੱਖਿਅਤ ਰਸਤੇ, ਆਵਾਜਾਈ ਵਾਲੇ ਦੇਸ਼ਾਂ ਦੀ ਮਦਦ ਕਰਨਾ ਅਤੇ ਮੂਲ ਕਾਰਨਾਂ ਦੇ ਹੱਲ ਨੂੰ ਮਜ਼ਬੂਤ ਕੀਤਾ ਜਾਣਾ ਚਾਹੀਦਾ ਹੈ।"

ਯੂ.ਐਨ.ਐਚ.ਸੀ.ਆਰ ਇਟਲੀ ਦੇ ਸੰਚਾਰ ਅਧਿਕਾਰੀ ਦੇ ਅਨੁਸਾਰ ਏਜੰਸੀ ਇਸ ਸਮੇਂ ਮਲਬੇ ਤੋਂ ਬਚੇ ਲੋਕਾਂ ਦੀ ਸਹਾਇਤਾ ਕਰ ਰਹੀ ਹੈ। ਅਧਿਕਾਰੀ ਨੇ X 'ਤੇ ਇੱਕ ਪੋਸਟ 'ਚ ਕਿਹਾ,"ਲੈਂਪੇਡੂਸਾ ਦੇ ਤੱਟ 'ਤੇ ਇੱਕ ਹੋਰ ਕਿਸ਼ਤੀ ਦੇ ਡੁੱਬਣ 'ਤੇ ਡੂੰਘਾ ਦੁੱਖ ਹੈ, ਜਿੱਥੇ UNHCR ਹੁਣ ਬਚੇ ਲੋਕਾਂ ਦੀ ਸਹਾਇਤਾ ਕਰ ਰਿਹਾ ਹੈ। ਇਟਲੀ ਵਿੱਚ IOM ਦੇ ਮੈਡੀਟੇਰੀਅਨ ਲਈ ਤਾਲਮੇਲ ਦਫ਼ਤਰ ਦੇ ਅੰਕੜਿਆਂ ਅਨੁਸਾਰ ਇਸ ਸਾਲ ਹੁਣ ਤੱਕ 13 ਅਗਸਤ ਤੱਕ ਮੈਡੀਟੇਰੀਅਨ ਰੂਟਾਂ 'ਤੇ ਘੱਟੋ-ਘੱਟ 962 ਪ੍ਰਵਾਸੀਆਂ ਦੀ ਮੌਤ ਹੋ ਗਈ, ਜਿਸ ਵਿੱਚ ਕੇਂਦਰੀ ਮੈਡੀਟੇਰੀਅਨ ਵਿੱਚ 675, ਪੱਛਮੀ ਮੈਡੀਟੇਰੀਅਨ ਵਿੱਚ 155 ਅਤੇ ਪੂਰਬੀ ਮੈਡੀਟੇਰੀਅਨ ਵਿੱਚ 132 ਮੌਤਾਂ ਸ਼ਾਮਲ ਹਨ।