NDA ਉਮੀਦਵਾਰ CP Radhakrishnan ਬਣੇ ਉਪ ਰਾਸ਼ਟਰਪਤੀ

ਭਾਰਤ ਦੇ ਉਪ ਰਾਸ਼ਟਰਪਤੀ ਦੀ ਚੋਣ ਵਿੱਚ ਐੱਨਡੀਏ ਉਮੀਦਵਾਰ ਸੀਪੀ ਰਾਧਾਕ੍ਰਿਸ਼ਨਨ ਨੇ ਵੱਡੀ ਜਿੱਤ ਹਾਸਲ ਕੀਤੀ। ਉਹ ਦੇਸ਼ ਦੇ 15ਵੇਂ ਉਪ ਰਾਸ਼ਟਰਪਤੀ ਚੁਣੇ ਗਏ ਹਨ। ਉਨ੍ਹਾਂ ਨੇ ਕੁੱਲ 452 ਵੋਟਾਂ ਪ੍ਰਾਪਤ ਕਰਕੇ ਆਪਣੇ ਵਿਰੋਧੀ ਅਤੇ ਇੰਡੀਆ ਗੱਠਜੋੜ ਦੇ ਬੀ. ਸੁਦਰਸ਼ਨ ਰੈੱਡੀ ਨੂੰ ਹਰਾਇਆ। ਸੁਦਰਸ਼ਨ ਰੈਡੀ ਨੂੰ 300 ਵੋਟਾਂ ਮਿਲੀਆਂ। ਐੱਨਡੀਏ ਨੇ ਲਗਭਗ ਦੋ-ਚੌਥਾਈ ਬਹੁਮਤ ਪ੍ਰਾਪਤ ਕਰ ਲਿਆ ਹੈ। ਭਾਰਤੀ ਜਨਤਾ ਪਾਰਟੀ ਨੇ ਦਾਅਵਾ ਕੀਤਾ ਕਿ 14 ਸੰਸਦ ਮੈਂਬਰਾਂ ਨੇ ਕਰਾਸ-ਵੋਟਿੰਗ ਕੀਤੀ।

ਨਤੀਜਿਆਂ ਤੋਂ ਬਾਅਦ, ਵਿਰੋਧੀ ਉਮੀਦਵਾਰ ਬੀ ਸੁਦਰਸ਼ਨ ਰੈੱਡੀ ਨੇ ਕਿਹਾ, ‘ਸਾਡੇ ਮਹਾਨ ਗਣਰਾਜ ਦੀਆਂ ਲੋਕਤੰਤਰੀ ਪ੍ਰਕਿਰਿਆਵਾਂ ਵਿੱਚ ਅਟੁੱਟ ਵਿਸ਼ਵਾਸ ਦੇ ਨਾਲ, ਮੈਂ ਨਿਮਰਤਾ ਨਾਲ ਨਤੀਜੇ ਨੂੰ ਸਵੀਕਾਰ ਕਰਦਾ ਹਾਂ।’ ਉਨ੍ਹਾਂ ਲਿਖਿਆ ਕਿ ‘ਹਾਲਾਂਕਿ ਨਤੀਜਾ ਮੇਰੇ ਹੱਕ ਵਿੱਚ ਨਹੀਂ ਹੈ, ਪਰ ਵਿਚਾਰਧਾਰਕ ਸੰਘਰਸ਼ ਹੋਰ ਵੀ ਜ਼ੋਰਦਾਰ ਢੰਗ ਨਾਲ ਜਾਰੀ ਹੈ।’

ਵਿਰੋਧੀ ਗੱਠਜੋੜ ਨੇ ਵੀ ਉਪ ਰਾਸ਼ਟਰਪਤੀ ਚੋਣ ਵਿੱਚ ਚੰਗੀ ਚੁਣੌਤੀ ਦਿੱਤੀ ਪਰ ਉਨ੍ਹਾਂ ਦੀ ਗਿਣਤੀ ਐੱਨਡੀਏ ਨਾਲੋਂ ਘੱਟ ਸੀ। ਇਸ ਚੋਣ ਨੂੰ ਜਿੱਤਣ ਲਈ 392 ਵੋਟਾਂ ਦੀ ਲੋੜ ਸੀ, ਜੋ ਐੱਨਡੀਏ ਉਮੀਦਵਾਰ ਨੇ ਆਸਾਨੀ ਨਾਲ ਪ੍ਰਾਪਤ ਕਰ ਲਈ।ਐੱਨਡੀਏ ਨੂੰ ਆਪਣੇ ਸਾਂਸਦਾਂ ਦੇ ਨਾਲ-ਨਾਲ ਕੁਝ ਕਰਾਸ ਵੋਟਿੰਗ ਦਾ ਲਾਭ ਵੀ ਮਿਲਿਆ। ਐੱਨਡੀਏ ਦੀ ਕੁੱਲ ਗਿਣਤੀ 427 ਸੀ, ਜੋ ਵਾਈਐੱਸਆਰ ਕਾਂਗਰਸ ਦੇ 11 ਸੰਸਦ ਮੈਂਬਰਾਂ ਦੇ ਜੋੜ ਨਾਲ ਵਧ ਕੇ 438 ਹੋ ਗਈ। ਇਸ ਤੋਂ ਇਲਾਵਾ, 14 ਵਾਧੂ ਵੋਟਾਂ ਕਰਾਸ ਵੋਟਿੰਗ ਰਾਹੀਂ ਸੀਪੀ ਰਾਧਾਕ੍ਰਿਸ਼ਨਨ ਦੇ ਖਾਤੇ ਵਿੱਚ ਗਈਆਂ।

ਦੱਸ ਦੇਈਏ ਕਿ ਇਹ ਚੋਣ ਉਪ-ਰਾਸ਼ਟਰਪਤੀ ਜਗਦੀਪ ਧਨਖੜ ਵੱਲੋਂ ਜੁਲਾਈ ਵਿੱਚ ਸਿਹਤ ਕਾਰਨਾਂ ਕਰਕੇ ਅਸਤੀਫਾ ਦੇਣ ਤੋਂ ਬਾਅਦ ਹੋਈ ਸੀ। ਸੰਸਦ ਕੰਪਲੈਕਸ ਦੇ ਵਸੁੰਧਾ ਭਵਨ ਵਿੱਚ ਸਵੇਰੇ 10 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਵੋਟਿੰਗ ਹੋਈ। ਇਸ ਚੋਣ ਵਿੱਚ ਸੰਸਦ ਦੇ ਦੋਵਾਂ ਸਦਨਾਂ ਦੇ ਸੰਸਦ ਮੈਂਬਰਾਂ ਨੇ ਵੋਟ ਪਾਈ।