GST 2.0: ਹੁਣ ਇਨ੍ਹਾਂ ਚੀਜ਼ਾਂ 'ਤੇ GST ਹੋਇਆ Zero... 22 ਸਤੰਬਰ ਤੋਂ ਲਾਗੂ ਹੋਣਗੀਆਂ ਨਵੀਆਂ ਦਰਾਂ

ਕੇਂਦਰ ਸਰਕਾਰ ਨੇ ਜੀਐੱਸਟੀ ਕੌਂਸਲ ਦੀ 56ਵੀਂ ਮੀਟਿੰਗ ਵਿੱਚ ਆਮ ਲੋਕਾਂ ਨੂੰ ਵੱਡੀ ਰਾਹਤ ਦਿੱਤੀ ਹੈ। ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਮੀਟਿੰਗ ਤੋਂ ਬਾਅਦ ਐਲਾਨ ਕੀਤਾ ਕਿ ਜੀਐੱਸਟੀ ਸਲੈਬ ਹੁਣ ਸਿਰਫ ਦੋ - 5 ਫੀਸਦੀ ਅਤੇ 18 ਫੀਸਦੀ ਤੱਕ ਘਟਾ ਦਿੱਤੇ ਗਏ ਹਨ। ਇਹ ਦਰਾਂ 22 ਸਤੰਬਰ ਤੋਂ ਲਾਗੂ ਹੋਣਗੀਆਂ। ਰੋਜ਼ਾਨਾ ਲੋੜਾਂ ਨਾਲ ਸਬੰਧਤ ਬਹੁਤ ਸਾਰੀਆਂ ਚੀਜ਼ਾਂ ਨੂੰ ਹੁਣ ਜ਼ੀਰੋ ਟੈਕਸ ਦੇ ਦਾਇਰੇ ਵਿੱਚ ਲਿਆਂਦਾ ਗਿਆ ਹੈ।

ਰਸੋਈ ਤੋਂ ਲੈ ਕੇ ਪੜ੍ਹਾਈ ਤਕ ਟੈਕਸ ਫ੍ਰੀ

ਖਾਣ ਲਈ ਤਿਆਰ ਭੋਜਨ, ਪਨੀਰ, ਦੁੱਧ, ਰੋਟੀ, ਬਰੈੱਡ ਅਤੇ ਪੀਜ਼ਾ ਵਰਗੇ ਭੋਜਨ ਉਤਪਾਦ ਹੁਣ ਟੈਕਸ ਮੁਕਤ ਹੋਣਗੇ।

ਇਸ ਤੋਂ ਇਲਾਵਾ, ਪੈਨਸਿਲ, ਰਬੜ, ਕਟਰ, ਨੋਟਬੁੱਕ ਅਤੇ ਗਲੋਬ ਵਰਗੀਆਂ ਵਿਦਿਅਕ ਵਸਤੂਆਂ ਨੂੰ ਵੀ ਜੀਐੱਸਟੀ ਤੋਂ ਛੋਟ ਦਿੱਤੀ ਗਈ ਹੈ।

ਕਿਸਾਨਾਂ ਲਈ ਵੀ ਰਾਹਤ

ਟਰੈਕਟਰਾਂ ਅਤੇ ਇਸਦੇ ਪੁਰਜ਼ਿਆਂ 'ਤੇ ਜੀਐੱਸਟੀ ਦਰਾਂ ਘਟਾ ਦਿੱਤੀਆਂ ਗਈਆਂ ਹਨ। ਹੁਣ ਟਰੈਕਟਰਾਂ 'ਤੇ ਸਿਰਫ਼ 5 ਫੀਸਦੀ ਟੈਕਸ ਲੱਗੇਗਾ, ਜੋ ਪਹਿਲਾਂ 12 ਫੀਸਦੀ ਸੀ।

ਦਵਾਈਆਂ ਅਤੇ ਸਿਹਤ ਬੀਮਾ 'ਤੇ ਰਾਹਤ

33 ਜੀਵਨ ਰੱਖਿਅਕ ਦਵਾਈਆਂ ਨੂੰ ਜੀਐੱਸਟੀ ਤੋਂ ਛੋਟ ਦਿੱਤੀ ਗਈ ਹੈ। ਇਸ ਤੋਂ ਇਲਾਵਾ, ਸਿਹਤ ਅਤੇ ਜੀਵਨ ਬੀਮਾ ਪਾਲਿਸੀਆਂ 'ਤੇ ਹੁਣ ਟੈਕਸ ਨਹੀਂ ਲੱਗੇਗਾ।

ਘਰੇਲੂ ਸਾਮਾਨਾਂ 'ਤੇ ਘਟਾਇਆ ਗਿਆ ਟੈਕਸ

ਸਾਈਕਲਾਂ, ਭਾਂਡੇ, ਦੁੱਧ ਦੀਆਂ ਬੋਤਲਾਂ, ਛਤਰੀਆਂ, ਬਾਂਸ ਦੇ ਫਰਨੀਚਰ, ਕੰਘੀਆਂ ਵਰਗੇ ਕਈ ਉਤਪਾਦਾਂ 'ਤੇ ਟੈਕਸ ਦਰਾਂ 12 ਫੀਸਦੀ ਤੋਂ ਘਟਾ ਕੇ 5 ਫੀਸਦੀ ਕਰ ਦਿੱਤੀਆਂ ਗਈਆਂ ਹਨ। ਇਸ ਦੇ ਨਾਲ ਹੀ, ਸ਼ੈਂਪੂ, ਸਾਬਣ, ਵਾਲਾਂ ਦਾ ਤੇਲ, ਫੇਸ ਪਾਊਡਰ ਵਰਗੇ ਨਿੱਜੀ ਦੇਖਭਾਲ ਉਤਪਾਦਾਂ 'ਤੇ ਜੀਐੱਸਟੀ ਦਰਾਂ 18 ਫੀਸਦੀ ਤੋਂ ਘਟਾ ਕੇ 5 ਫੀਸਦੀ ਕਰ ਦਿੱਤੀਆਂ ਗਈਆਂ ਹਨ।