ਹੁਣ ਜਲੰਧਰ ‘ਚ ਨਸ਼ਾ ਮਾਫੀਆ ‘ਤੇ ਬੁਲਡੋਜ਼ਰ ਐਕਸ਼ਨ

ਪੰਜਾਬ ਸਰਕਾਰ ਵੱਲੋਂ ਨਸ਼ਾ ਮਾਫੀਆ ਅਤੇ ਗੈਂਗਸਟਰਾਂ ਵਿਰੁੱਧ ਕਾਰਵਾਈ ਤੀਵਰ ਗਤੀ ਨਾਲ ਜਾਰੀ ਹੈ। ਤਾਜ਼ਾ ਮਾਮਲੇ ਅਨੁਸਾਰ, ਜਲੰਧਰ ਦੇ ਕਾਜ਼ੀ ਮੰਡੀ ਨੇੜਲੇ ਇਲਾਕੇ ਵਿੱਚ ਇੱਕ ਢਾਬੇ ‘ਤੇ ਬੁਲਡੋਜ਼ਰ ਚਲਾਇਆ ਗਿਆ। ਇਹ ਢਾਬਾ ਧਰਮਿੰਦਰ ਨਾਮੀ ਵਿਅਕਤੀ ਦਾ ਸੀ, ਜਿਸ ਉੱਤੇ ਨਸ਼ਾ ਤਸਕਰੀ ਅਤੇ ਪੁਲਸ ‘ਤੇ ਹਮਲੇ ਵਰਗੇ ਗੰਭੀਰ ਮਾਮਲੇ ਦਰਜ ਹਨ।

ਪੁਲਸ ਵੱਲੋਂ ਵੱਡੀ ਤਾਦਾਦ ‘ਚ ਨਿਗਰਾਨੀ
ਇਸ ਕਾਰਵਾਈ ਦੌਰਾਨ ਸਵੇਰ ਤੋਂ ਹੀ ਇਲਾਕੇ ਵਿੱਚ ਭਾਰੀ ਪੁਲਸ ਬਲ ਤਾਇਨਾਤ ਸੀ। ਜਲੰਧਰ ਨਗਰ ਨਿਗਮ ਦੀ ਮਦਦ ਨਾਲ, ਜੇ.ਸੀ.ਬੀ. ਮਸ਼ੀਨਾਂ ਰਾਹੀਂ ਢਾਬੇ ਨੂੰ ਢਾਹ ਦਿੱਤਾ ਗਿਆ। ਪੁਲਸ ਮੁਤਾਬਕ ਧਰਮਿੰਦਰ ਦੀ ਕਈ ਗਤੀਵਿਧੀਆਂ ਗੈਰਕਾਨੂੰਨੀ ਸਨ, ਜਿਸ ਕਰਕੇ ਇਹ ਕਾਰਵਾਈ ਕੀਤੀ ਗਈ।

ਪੁਲਸ ‘ਤੇ ਹਮਲੇ ਦੇ ਮਾਮਲੇ ‘ਚ ਆਇਆ ਸੀ ਨਾਮ
ਜ਼ਿਕਰਯੋਗ ਹੈ ਕਿ 25 ਜਨਵਰੀ 2024 ਨੂੰ ਜਲੰਧਰ ਪੁਲਸ ਦੀ ਸੀ.ਆਈ.ਏ. ਸਟਾਫ਼ ਦੀ ਟੀਮ, ਜੋ ਕਿ ਅਸਲਾ ਐਕਟ ਨਾਲ ਸਬੰਧਤ ਛਾਪੇਮਾਰੀ ਕਰਨ ਗਈ ਸੀ, ਉਨ੍ਹਾਂ ‘ਤੇ ਧਰਮਿੰਦਰ ਅਤੇ ਉਸਦੇ ਸਾਥੀਆਂ ਨੇ ਗੋਲੀਆਂ ਚਲਾਈਆਂ ਸਨ। ਹਾਲਾਂਕਿ, ਪੁਲਸ ਨੇ ਕੁਝ ਦਿਨਾਂ ਬਾਅਦ ਧਰਮਿੰਦਰ ਨੂੰ ਗ੍ਰਿਫ਼ਤਾਰ ਕਰ ਲਿਆ।

ਮੁਲਜ਼ਮ ‘ਤੇ ਗੰਭੀਰ ਧਾਰਾਵਾਂ ਤਹਿਤ ਦਰਜ ਹੈ ਕੇਸ
ਧਰਮਿੰਦਰ ਅਤੇ ਉਸਦੇ ਸਾਥੀਆਂ ਖ਼ਿਲਾਫ਼ ਥਾਣਾ ਰਾਮਾਮੰਡੀ ‘ਚ ਧਾਰਾ 221, 132, 109 ਬੀ.ਐੱਨ.ਐੱਸ. ਅਤੇ ਅਸਲਾ ਐਕਟ ਦੀਆਂ ਧਾਰਾਵਾਂ 25-27-54-59 ਤਹਿਤ ਕੇਸ ਦਰਜ ਕੀਤਾ ਗਿਆ ਸੀ। ਇਹ ਗੈੰਗ ਪੁਲਸ ‘ਤੇ ਹਮਲਾ ਕਰਨ ‘ਚ ਵੀ ਸ਼ਾਮਲ ਸੀ, ਜਿਸ ਦੌਰਾਨ ਦੋ ਮੁਲਾਜ਼ਮ ਜ਼ਖ਼ਮੀ ਹੋਏ।

ਬੁਲਡੋਜ਼ਰ ਐਕਸ਼ਨ ਅਜੇ ਵੀ ਜਾਰੀ
ਪੰਜਾਬ ਵਿੱਚ ਨਸ਼ਾ ਮਾਫੀਆ ਅਤੇ ਗੈੰਗਸਟਰਾਂ ਵਿਰੁੱਧ ਪੰਜਾਬ ਸਰਕਾਰ ਦੀ ਕਾਰਵਾਈ ਲਗਾਤਾਰ ਜਾਰੀ ਹੈ। ਪੁਲਸ ਅਧਿਕਾਰੀਆਂ ਮੁਤਾਬਕ, ਜਲੰਧਰ ‘ਚ ਹੋਰ ਅਸਾਮਾਜਿਕ ਤੱਤਾਂ ਖ਼ਿਲਾਫ਼ ਵੀ ਐਕਸ਼ਨ ਲਿਆ ਜਾਵੇਗਾ।