ਕਪੂਰਥਲਾ ਤੋਂ ਗ੍ਰਿਫ਼ਤਾਰ ਹੋਏ ਦੁੱਗਲ ਚਾਪ ’ਤੇ ਹਮਲਾ ਕਰਨ ਵਾਲੇ 2 ਨਿਹੰਗ – ਹੋ ਸਕਦੇ ਹਨ ਵੱਡੇ ਖ਼ੁਲਾਸੇ

ਮਿਲਾਪ ਚੌਂਕ ਸਥਿਤ ਦੁੱਗਲ ਚਾਪ ਰੈਸਟੋਰੈਂਟ ਵਿਚ ਮਾਲਕ ਭਰਾਵਾਂ ’ਤੇ ਹਮਲੇ ਅਤੇ ਤੋੜ-ਫੋੜ ਦੇ ਮਾਮਲੇ ’ਚ ਪੁਲਿਸ ਨੇ ਵੱਡੀ ਕਾਰਵਾਈ ਕਰਦਿਆਂ 2 ਨਿਹੰਗ ਸਿੰਘਾਂ ਨੂੰ ਕਪੂਰਥਲਾ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਇਹ ਗ੍ਰਿਫ਼ਤਾਰੀ ਥਾਣਾ ਨੰਬਰ 4 ਦੀ ਟੀਮ ਵੱਲੋਂ ਗੁਪਤ ਸੂਚਨਾ ਦੇ ਆਧਾਰ ’ਤੇ ਕੀਤੀ ਗਈ, ਜਦੋਂ ਦੋਵੇਂ ਮੁਲਜ਼ਮ ਸ਼ਹਿਰ ਛੱਡਣ ਦੀ ਕੋਸ਼ਿਸ਼ ’ਚ ਸਨ।

ਗ੍ਰਿਫ਼ਤਾਰ ਹੋਏ ਨਿਹੰਗਾਂ ਦੀ ਪਛਾਣ ਸੌਰਵ ਸਿੰਘ ਉਰਫ਼ ਬਾਜ ਅਤੇ ਸੌਰਵ ਸਿੰਘ ਉਰਫ਼ ਸੋਨੂੰ ਵਾਸੀ ਕਪੂਰਥਲਾ ਵਜੋਂ ਹੋਈ ਹੈ। ਐਡੀਸੀਪੀ-1 ਆਕ੍ਰਿਸ਼ੀ ਜੈਨ ਨੇ ਦੱਸਿਆ ਕਿ ਦੋਵੇਂ ਮੁਲਜ਼ਮਾਂ ਨੂੰ ਰਿਮਾਂਡ ’ਤੇ ਲੈ ਕੇ ਹੋਰ ਹਮਲਾਵਰਾਂ ਦੀ ਪਛਾਣ ਲਈ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਮਾਮਲੇ ਦੇ ਮੁੱਖ ਸਾਜ਼ਿਸ਼ਕਰਤਾ ਇੰਦਰਜੀਤ ਸਿੰਘ ਸਮੇਤ ਹੋਰ ਨਿਹੰਗ ਸਿੰਘਾਂ ਦੀ ਗ੍ਰਿਫ਼ਤਾਰੀ ਲਈ ਰੇਡ ਜਾਰੀ ਹਨ। ਹਮਲਾਵਰਾਂ ਵਿੱਚ ਕੁਝ ਹੋਰ ਵਿਅਕਤੀ ਵੀ ਸ਼ਾਮਲ ਹਨ, ਜਿਨ੍ਹਾਂ ਵਿੱਚ ਇੱਕ ਕੱਪੜੇ ਦੇ ਸ਼ੋਰੂਮ ਵਿੱਚ ਕੰਮ ਕਰਨ ਵਾਲਾ ਨੌਜਵਾਨ ਅਤੇ ਇੱਕ ਕੇਬਲ ਕਾਰੋਬਾਰੀ ਦਾ ਰਿਸ਼ਤੇਦਾਰ ਵੀ ਹੈ।

ਕੀ ਸੀ ਘਟਨਾ ਦਾ ਪੂਰਾ ਮਾਮਲਾ?
ਮੰਗਲਵਾਰ ਨੂੰ ਚਾਰ ਨੌਜਵਾਨ, ਜਿਨ੍ਹਾਂ ਵਿੱਚ ਇੰਦਰਜੀਤ ਸਿੰਘ ਅਤੇ ਵਿਸ਼ਨੂੰ ਵੀ ਸ਼ਾਮਲ ਸਨ, ਦੁੱਗਲ ਚਾਪ ਰੈਸਟੋਰੈਂਟ ਵਿੱਚ ਚਾਪ ਖਾਣ ਆਏ। ਆਰਡਰ ਲੇਟ ਹੋਣ ’ਤੇ ਉਨ੍ਹਾਂ ਨੇ ਦੁਕਾਨ ਮਾਲਕ ਤਿੰਨ ਭਰਾਵਾਂ ਵਿੱਚੋਂ ਰਾਜੀਵ ਦੁੱਗਲ ਨਾਲ ਤਕਰਾਰ ਕਰ ਲਈ, ਗਾਲ੍ਹਾਂ ਕੱਢੀਆਂ ਤੇ ਧਮਕੀਆਂ ਵੀ ਦਿੱਤੀਆਂ।

ਇਸ ਦੇ ਤੁਰੰਤ ਅਗਲੇ ਦਿਨ, ਬੁੱਧਵਾਰ ਰਾਤ ਨੂੰ ਇੰਦਰਜੀਤ ਸਿੰਘ ਆਪਣੇ ਨਾਲ ਲਗਭਗ 15 ਨਿਹੰਗ ਸਿੰਘਾਂ ਨੂੰ ਲੈ ਕੇ ਰੈਸਟੋਰੈਂਟ ਆਇਆ ਅਤੇ ਉਥੇ ਤਿੰਨਾਂ ਭਰਾਵਾਂ ’ਤੇ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰ ਦਿੱਤਾ। ਹਮਲੇ ਦੌਰਾਨ ਰੈਸਟੋਰੈਂਟ ਵਿਚ ਭੰਨ-ਤੋੜ ਵੀ ਕੀਤੀ ਗਈ।

ਮੁਲਜ਼ਮ ਪੱਖ ਵੱਲੋਂ ਵੀਡੀਓ ਜਾਰੀ, ਰੈਸਟੋਰੈਂਟ ਮਾਲਕ ਨੇ ਕਿਹਾ – ‘ਝੂਠ ਬੋਲਾ ਜਾ ਰਿਹਾ’
ਰੈਸਟੋਰੈਂਟ ਮਾਲਕ ਰਾਜੀਵ ਦੁੱਗਲ ਨੇ ਦੱਸਿਆ ਕਿ ਹਮਲਾਵਰ ਪੱਖ ਵੱਲੋਂ ਇੱਕ ਵੀਡੀਓ ਜਾਰੀ ਕਰਕੇ ਇਹ ਦੱਸਣ ਦੀ ਕੋਸ਼ਿਸ਼ ਕੀਤੀ ਗਈ ਕਿ ਹਮਲਾਵਰ ਪਰਿਵਾਰ ਸਮੇਤ ਚਾਪ ਖਾਣ ਆਏ ਸਨ। ਰਾਜੀਵ ਨੇ ਇਸ ਦਾਅਵੇ ਨੂੰ ਝੂਠ ਦੱਸਦਿਆਂ ਕਿਹਾ ਕਿ ਚਾਰ ਨੌਜਵਾਨ ਹੀ ਆਏ ਸਨ ਅਤੇ ਉਨ੍ਹਾਂ ਦੀ ਬੈਕਸਾਈਡ ’ਤੇ ਇੱਕ ਪਰਿਵਾਰ ਬੈਠਾ ਸੀ।

ਉਨ੍ਹਾਂ ਦੱਸਿਆ ਕਿ ਇਹ ਨੌਜਵਾਨ ਮਹਿਲਾ ਗਾਹਕਾਂ ਸਾਹਮਣੇ ਗੰਦੀਆਂ ਗਾਲ੍ਹਾਂ ਕਰ ਰਹੇ ਸਨ, ਜਿਸ ਦਾ ਵਿਰੋਧ ਕਰਨ ’ਤੇ ਉਨ੍ਹਾਂ ਨੇ ਹਮਲਾ ਕਰ ਦਿੱਤਾ। ਰਾਜੀਵ ਨੇ ਕਿਹਾ ਕਿ ਹੁਣ ਇਹ ਲੋਕ ਵੀਡੀਓ ਵਾਇਰਲ ਕਰਕੇ ਇਸ ਮਾਮਲੇ ਨੂੰ ਧਾਰਮਿਕ ਰੂਪ ਦੇਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਪਰ ਉਨ੍ਹਾਂ ਕੋਲ ਸਾਰੀਆਂ ਮੂਲ ਵੀਡੀਓਜ਼ ਮੌਜੂਦ ਹਨ ਜੋ ਸੱਚਾਈ ਨੂੰ ਬਿਆਨ ਕਰਦੀਆਂ ਹਨ।

ਪੁਲਿਸ ਵੱਲੋਂ ਹੋਰ ਗ੍ਰਿਫ਼ਤਾਰੀਆਂ ਦੀ ਸੰਭਾਵਨਾ
ਮਾਮਲੇ ਦੀ ਗੰਭੀਰਤਾ ਨੂੰ ਵੇਖਦੇ ਹੋਏ ਪੁਲਿਸ ਵੱਲੋਂ ਹੋਰ ਸਾਜ਼ਿਸ਼ਕਾਰਾਂ ਦੀ ਗ੍ਰਿਫ਼ਤਾਰੀ ਲਈ ਮੁਹਿੰਮ ਚਲਾਈ ਜਾ ਰਹੀ ਹੈ ਅਤੇ ਆਉਣ ਵਾਲੇ ਦਿਨਾਂ ’ਚ ਹੋਰ ਵੱਡੇ ਖ਼ੁਲਾਸਿਆਂ ਦੀ ਉਮੀਦ ਹੈ।

Leave a Reply

Your email address will not be published. Required fields are marked *